51²è¹Ý

Dysgwch a allwch dalu cyfraniadau Yswiriant Gwladol gwirfoddol yn seiliedig ar bethau fel eich statws cyflogaeth, oedran, a ble’r ydych yn byw.

Os ydych yn gyflogedig

Gallwch dalu cyfraniadau gwirfoddol Dosbarth 3 os ydych yn gyflogedig ac mae’r ddau beth canlynol yn wir:

• rydych yn ennill llai na £125 yr wythnos

• nad ydych yn gymwys i gael credydau Yswiriant Gwladol

Os ydych yn hunangyflogedig

Gallwch dalu cyfraniadau gwirfoddol Dosbarth 2 neu Ddosbarth 3 os ydych yn hunangyflogedig a bod gennych naill ai:

• incwm gros o £1,000 neu lai

• incwm gros dros £1,000, ond gydag elw o lai na £6,845

Gallwch hefyd dalu cyfraniadau gwirfoddol Dosbarth 2 neu Ddosbarth 3 os ydych yn hunangyflogedig gyda swydd benodol. Mae hyn yn berthnasol os ydych yn un o’r canlynol:

• arholwr, safonwr, goruchwyliwr neu berson sy’n gosod cwestiynau arholiad

• landlord ac yn gymwys i dalu Yswiriant Gwladol Dosbarth 2

• gweinidog yr efengyl nad yw’n cael cyflog na thâl

• person sy’n gwneud buddsoddiadau – ond nid fel busnes, a heb gael ffi na chomisiwn

Mae cyfraniadau gwirfoddol yn cyfrif tuag at eich Pensiwn y Wladwriaeth a rhai budd-daliadau. Gallwch wirio pa fudd-daliadau y mae’ch cyfraniadau Yswiriant Gwladol yn cyfrif tuag atynt.

Os ydych yn gyflogedig ac yn hunangyflogedig

Gallwch wirio rhagolwg o’ch Pensiwn y Wladwriaeth i weld a fyddwch yn elwa o dalu cyfraniadau gwirfoddol os:

• ydych yn ennill llai na £125 o gyflogaeth

• oes gennych elw sy’n llai na £6,845 o hunangyflogaeth

Gallwch hefyd gysylltu â Chanolfan Pensiwn y Dyfodol i wirio a oes gennych fwlch yn eich cyfraniadau Yswiriant Gwladol, ac i gael gwybod a fyddai o fudd i chi wneud taliad.

Os ydych chi dros oedran Pensiwn y Wladwriaeth, bydd angen i chi gysylltu â’r Gwasanaeth Pensiwn i wirio a oes gennych fwlch. Byddant hefyd yn gallu rhoi gwybod i chi a fyddai o fudd i chi wneud taliad.

Os ydych yn ddi-waith

Gallwch dalu cyfraniadau gwirfoddol Dosbarth 3 os ydych yn ddi-waith ac mae’r ddau beth canlynol yn wir:

• nid ydych yn hawlio budd-daliadau

• nid ydych yn cael credydau Yswiriant Gwladol

Os ydych yn byw neu’n gweithio dramor (neu wedi gwneud yn flaenorol)

I dalu cyfraniadau gwirfoddol Dosbarth 2 neu Ddosbarth 3 mae’n rhaid i chi naill ai:

• fod wedi byw yn y DU am 3 blynedd yn olynol 

• fod wedi talu cyfraniadau, neu wedi trin cyfraniadau Dosbarth 2 fel pe baent wedi’u talu am o leiaf 3 blynedd

I dalu cyfraniadau gwirfoddol Dosbarth 2, mae’n rhaid i’r ddau beth canlynol fod yn berthnasol hefyd:

• roeddech yn gweithio yn y DU yn syth cyn gadael 

• rydych yn gweithio dramor ar hyn o bryd (neu wedi bod yn gweithio tra roeddech dramor)

Os ydych o dan oedran Pensiwn y Wladwriaeth, gallwch wirio rhagolwg o’ch Pensiwn y Wladwriaeth neu gysylltu â Chanolfan Pensiwn y Dyfodol i weld a fyddwch yn elwa o dalu cyfraniadau gwirfoddol.

Os ydych dros oedran Pensiwn y Wladwriaeth, neu os byddwch yn cyrraedd oedran Pensiwn y Wladwriaeth yn ystod y 6 mis nesaf, cysylltwch â’r Ganolfan Pensiynau Rhyngwladol (yn agor tudalen Saesneg). Byddant yn gwirio a oes gennych fwlch yn eich cyfraniadau Yswiriant Gwladol ac yn rhoi gwybod i chi faint sydd angen i chi ei dalu.

Os ydych dros oedran Pensiwn y Wladwriaeth

Os ydych wedi cyrraedd oedran Pensiwn y Wladwriaeth (yn agor tudalen Saesneg) ac am lenwi bylchau yn eich cofnod Yswiriant Gwladol, gallwch dalu:

• cyfraniadau Dosbarth 3

• cyfraniadau Dosbarth 2 os ydych yn gymwys

Cael help i gyfrifo pa gyfraniadau Yswiriant Gwladol y gallwch eu talu

Defnyddiwch i gael gwybod:

• a allwch dalu cyfraniadau Yswiriant Gwladol

• pa fath o gyfraniadau gwirfoddol y gallwch eu talu